2024-06-27
बुटवल, नेकपा(एमाले) केन्द्रीय सचिव तथा लुम्विनी इन्चार्ज पद्या अर्यालले नेकपा (एमाले) प्रदेश कमिटी लुम्विनीको तेश्रो पूर्ण बैठकलाई सम्वोधन गर्दै पार्टीलाई एजेण्डाले नेतृत्व गर्ने भएकोले अहिलेको अवस्थामा मुख्यतः राष्ट्रिय स्वाभिमान र स्वाधिनताको विषय सहित चारवटा एजेण्डालाई आत्मसात गरेर पार्टी कामलाई अघि वढाउन आवश्यक रहेको बताउनु भयो ।
बुटवलमा सम्पन्न वैठकको अध्यक्षता अध्यक्ष राधाकृष्ण कँडेलले र सञ्चालन सचिव लक्ष्मण आचार्यले गर्नुभएको थियो । जनताका तात्कालिन र दीर्घकालिन एजेण्डाको रुपमा शिक्षा, स्वास्थ्य, आवास र रोजगारीलाई ग्यारेन्टी गरेर जान सक्दा मात्र सवै वर्ग र समुदायका एजेण्डालाई आत्मसात गर्न सकिने भएकोले तदनुसारका विषयलाई खभियानका रुपमा लैजान आवश्यक छ, अर्यालले भन्नुभयो ।
जनता दर्शन तथा दस्तावेज पढेर मात्र बस्दैनन् भन्ने कुरा पनि हामीले वुझ्नुपर्छ भन्दै उहाँले भन्नुभयो– पार्टी परिवर्तनको वाहक र देशको संरक्षक भएकोले पार्टीलाई जनतामा आधारित पार्टी बनाउनु जरुरी छ ।
उहाँले कार्यकर्ताका पनि एजेण्डा रहेको तर्फ संकेत गर्दै करप्टेड र फ्रष्टेड हुनबाट वचाउनु, हरेक कार्यकर्ताले पार्टीलाई अभिभावक सम्झने अवस्था सृजना गर्नु र हामी स्वयं नेता पनि सुध्रिन जरुरी रहेको वताउनुभयो ।
आजका नेता कार्यकर्ताले नीति र प्रविधिलाई संगसंगै लैजान आवश्यक छ रहेकोले अवका वैठकमा यस्ता एजेण्डालाई छलफलको विषय बनाउन अपिल गर्नुभयो । उहाँले परम्परागत हिसावले हैन, विषय केन्द्रीत छलफल गर्ने, निश्चित समय तोक्ने, प्रविधिको सदुपयोग गरी आफ्ना धारणा पठाउने र आवश्यक पर्दा भर्चुअल माध्यमबाट पार्टीका वैठक र प्रशिक्षण सञ्चालन गर्न सुझाव दिनुभयो ।
पार्टीको काम समाज रुपान्तरण गर्ने भएकोले नीति र विचारका साथै जनताले अनुभूत गर्ने गरी समाज रुपान्तरणका काममा लाग्न अर्यालले निर्देशन गर्नुभयो । बलियो राष्ट्रिय शक्ति नभई रुपान्तरणका काम गर्न नसकिने तर्क प्रस्तुत गर्दै प्रमुख अतिथि अर्यालले आफैबाट रुपान्तरणको अभियान शुरु गर्न र हरेकले आफ्ना काम तथा चरित्रवारे आत्मसमिक्षा गर्न पनि अपिल गर्नुभयो । 
वैठकमा अध्यक्ष कँडेलले नौ वटा प्रस्ताव पेश गर्नुभएको थियो । जस अनुसार प्रदेश सरकारमा प्रतिनिधित्व गर्ने मन्त्री र राजनीति नियुक्ति पाउनेको सम्मान तथा वार्षिक कार्ययोजना–२०८० को समिक्षा, वार्षिक कार्ययोजना–२०८१ प्रस्तुत, जिल्ला तथा मातहत कमिटीका वैठक र प्रदेश कमिटीको मनोनयन सम्वन्धी प्रस्तावहरु थिए । वैठकले सात जनालाई प्रदेश कमिटीमा मनोनयन गरेको छ ।
जसमा उमा विक चन्द वोहरा (कपिलवस्तु) र पूर्व जिल्ला अध्यक्षहरू तेजेन्द्र केसी (रुपन्देही), डम्वर शर्मा (कपिलवस्तु), टोपवहादुर ओली (पूर्वी रुकुम), किष्मत कक्षपति (बाँके), हुकुमवहादुर वस्नेत (दाङ), लालवहादुर श्रेष्ठ (बर्दिया) लगायत ७ जना । बैठकले पार्टीको मुखपत्र लुम्विनी सन्देशको प्रकाशनका लागि आवश्यक तयारी गर्ने, जिल्ला र पालिका कमिटीको कार्यालय तथा अभिलेखीकरणलाई व्यवस्थित गर्ने, आन्तरिक लेखा परीक्षणका विषयमा पनि विभिन्न निर्णयहरु गरेको छ । वैठकमा पोलिटव्युरो सदस्यहरु दलवहादुर राना, वैजनाथ चौधरी, लिला गिरी, दधिराम न्यौपाने, खेममान खड्कालगायत केन्द्रीय सदस्य, सल्लाहकार, विभिन्न आयोगका सदस्यहरुसमेतको उपस्थिति थियो । वैठकले १० वूँदे समसामयिक प्रस्तावहरु पारित गरेको छ ।
